1. Bosh sahifa
2. Yangiliklar

Ўзбекистон касаба уюшмалари куни байрами муносабати билан умумтаълим мактабларида “Ёш китобхон” танлови ўтказилмоқда

×

Ўзбекистон касаба уюшмалари Федерацияси ижроия қўмитасининг Ўзбекистон Республикаси Халқ таълими вазирлиги билан имзоланган қўшма қарори ижросини таъминлаш мақсадида Ўзбекистон туманидаги мавжуд 70 та умумтаълим мактабларида “Ёш китобхон” танлови ўтказилмоқда.

9-, 10- ва 11-синф ўқувчилари ўртасида ўтказилаётган китобхонлик танловида иштирокчилар тест ва савол-жавоблар асосида ўз билимларини синовдан ўтказишмоқда. Ўқувчиларни танловга пухта тайёргарлик кўришлари учун фойдаланиладиган адабиётлар рўйхати олдиндан берилди. Шунингдек, туман ахборот кутубхона маркази томонидан мактаб кутубхонасига қўшимча кўчма кутубхоналар ҳам ташкил этилди.

– Китоб – ақл чироғи, тафаккур қаноти эканлиги ҳеч кимга сир эмас. Шуниси аниққи, китобнинг ўрнини замонавий қурилма ва воситалар боса олмайди. Шу мақсадда, байрам арафасида ўқувчилар ўртасида китобхонликни янада тарғиб этиш, китобхонлик маданиятини ошириш учун мазкур танловни ташкил этдик. Унда кўплаб юқори синф ўқувчилари фаол қатнашаётгани барчамизни мамнун этмоқда, – дейди Таълим ва фан ходимлари касаба уюшмаси туман бўлинмаси Кенгаши раиси Зулфияхон Усмонова.

Қайд этилишича, танловда ғолибликни қўлга киритган ва фаол иштирок этган ўқувчи ёшлар ҳамда уларнинг устозлари 11 ноябрь – Ўзбекистон касаба уюшмалари куни муносабати билан туманда ўтказиладиган байрам тадбирлари давомида муносиб тақдирланадилар.